كشف السيناريست بلال فضل عن تواصله مع الفنانة المصرية عبلة كامل للاطمئنان عليها بعد انتشار أنباء تفيد إصابتها بمرض السرطان، وذلك عبر حساباته بمواقع التواصل الاجتماعي.
ونقل فضل رسالة عبلة كامل التي جاء نصها كالتالي:
-عيب، والله العظيم عيب، لو الناس مش هتتقي ربنا وتخاف منه في وقت زي ده هتتقيه وتخاف منه امتى؟ وإيه اللي هيستفيده إنسان من إنه يقلق حياة الناس بكلام كذب، بيدعي إنه بينشره لإنه محب أو معجب.
وأضافت: أنا اخترت نمط حياة سعيدة بيه وراضية عنه، وما عنديش أي حسابات على سوشيال ميديا ولا هيبقى عندي في أي يوم من الأيام، ولا بتابع سوشيال ميديا ولا بانشر عليها أي شيء من أي نوع ولا مهتمة بده، وأتمنى اللي يشوف حساب منسوب ليا يساهم في قفله باللي يقدر عليه والحساب اللي عاملاه واحدة بتدعي إنها بنتي ما لوش أي علاقة ببناتي فاطمة وزينب، وكل اللي بيتنشر فيه كذب، والكلام اللي اتنشر في هذا الحساب عن إني مش فخورة بفني وبشغلي كله كذب وافترا.
وتابعت: الحمد لله أنا في أحسن صحة وعافية، وباشكر الناس الطيبين كلهم على محبتهم وتقديرهم اللي أنا ممتنة ليها وباحمد ربنا عليها، وربنا يتقبل دعواتكم الجميلة ليا ويخلي لكم حبايبكم.